लुम्बिनी एक्स्पो आफैंमा एउटा ब्रान्ड हो : सदस्य सचिव दयानिधि भण्डारी
- बसन्तराज बराल
- 26 Dec, 2023
<
बुटवल,१० पुस। स्वरोजगार आत्मनिर्भरता हाम्रो आधार,सहर देखि गाँउसम्म व्यापार विस्तार भन्ने नाराका साथ पुस ५ गतेदेखि बुटवल मण्डप स्थित प्रदर्शनी केन्द्रमा लुम्बिनी एक्स्पो २०८० भव्य रूपमा सञ्चालन भैरहेको छ ।
महोत्सवमा विभिन्न क्षेत्रका महिला समूहहरू, विभिन्न भाषाभाषी र जातजातिहरू आफ्नो मौलिक संस्कार र संस्कृतिको प्रदर्शन भैरहेको छ भने सानादेखि ठूला व्यवसायीहरू व्यापार व्यवसायको प्रवद्र्धन एवं उत्पादन बिक्री बितरण गरीरहेका छन् । अन्तर्राष्ट्रिय व्यापार मेलाको आज छैठौं दिन दर्शकको अत्यधिक चाप बढेको छ । मंगलबार मात्रै ८० हजार बढीले मेला अवलोकन गरेका मेला आयोजक रुपन्देही ब्यापार संघ बुटवलले जनाएको छ ।
महोत्सवको पनि महोत्सवको रुपमा चर्चा कमाएको लुम्बिनी एक्स्पो आफैंमा एउटा ब्रान्ड भएको आयोजक संस्था रूपन्देही व्यापार संघका महासचिव एवं महोत्सवका मुल आयोजक समितिका सदस्य सचिव दयानिधि भण्डारीको दाबी छ ।
अन्तर्राष्ट्रिय व्यापार मेलाको आज छैठौं दिनसम्म आइपुग्दा हाम्रा अग्रज व्यवसायीहरू, शुभचिन्तकहरू, विभिन्न जातजाति, भाषाभाषी, आमा महिला समूहहरू एवं सम्पूर्ण बुटवलवासीहरू एकताबद्ध भएर गरेको योगदान अतुलनीय छ,’ महासचिव भण्डारीले भने ।
जब लुम्बिनी एक्स्पो लाग्छ तब सम्पूर्ण बुटवलवासीहरूले महोत्सवलाई एउटा पर्वको रुपमा मनाउँछन्, बालकदेखि वृद्ध सबैलाई महोत्सवको रौनकले छुने गर्दछ, बुटवल महोत्सवमा देखिने एकता सद्भाव बिरलै अन्य मेला महोत्सवहरूमा देख्न पाइन्छ, सम्पूर्णमा लुम्बिनी एक्स्पो (बुटबल महोत्सव) हाम्रो हो भन्ने अपनत्वको भावना रहेको पाइन्छ, यसैले गर्दा लुम्बिनी एक्स्पो आफैंमा एउटा ब्रान्ड हो, यसको उचाइलाई कसरी कायम राखिरहने भन्नेमा हामी सबै सजग छौं,’ उनले भने ।
देशको अर्थतन्त्र शिथिल अवस्थामा रहेकाले महोत्सव गर्न चुनौतीपूर्ण रहे पनि विभिन्न व्यावसायिक प्रतिष्ठानहरू एवं व्यवसायीहरूको तर्फबाट महोत्सवलाई राम्रो साथ मिलेकाले मेला सफलतापूर्वक सम्पन्न गर्न आफूहरू उत्साहित रहेको उनले बताए । महोत्सव सञ्चालनले यस क्षेत्रको आर्थिक गतिविधि बढाउने र आर्थिक चलयमान भई व्यवसायीहरूमा उत्साह थपिने आयोजकको दाबी छ ।
महोत्सवमा राष्ट्रिय तथा अन्तर्राष्ट्रिय स्तरका लघु, घरेलु, साना–ठूला औद्योगिक तथा व्यापारिक प्रतिष्ठानहरूका वस्तु तथा सेवा, हस्तकला, यातायातका साधनहरू, कृषि तथा पशुजन्य वस्तुहरू, विद्यालय स्तरीय शैक्षिक एवं विज्ञान सामग्री, सूचना र सञ्चार प्रविधिमा भएका नयाँ आयामहरूको जगेर्ना, नयाँ प्रतिभाको खोजी अभियान, सांस्कृतिक जगेर्ना कार्यक्रम लगायत थुप्रै कार्यक्रमहरू समावेश गरिएको र यसबाट स्थानीय उत्पादनको बजारीकरण, नयाँ प्रविधि तथा सिपको हस्तान्तरण, साहित्य, कला र संस्कृतिको जगेर्ना तथा आन्तरिक एवं बाह्य पर्यटक प्रवद्र्धनमा टेवा पुग्ने संघका अध्यक्ष एवं महोत्सवका संयोजक कृष्णप्रसाद घिमिरेले जानकारी दिए ।
मंगलवार अन्य दिनको तुलनामा व्यापार पनि धेरै भएको स्टल धनीहरुले बताएका छन् । मेलाका स्टल, होटेल–रेष्टुरेन्ट र बाल उद्यानमा उत्साहजनक ब्यापार भएको र अवलोकनका लागि आएका दर्शकहरुले खाद्यान्न, कपडा, कस्मेटीक, चिया तथा कृषि उत्पादनका स्टलहरुमा बढी चासो दिएर हेर्नुका साथै खरिद पनि गरेको बताइएको छ । मंगलवार मेलामा रहेका ६ सय ६० स्टलहरु तथा बाल उद्यानबाट मात्र करिव १ करोडको आर्थिक कारोवार भएको अनुमान गरिएको छ ।
मेलाको आर्कषणको केन्द्र सांस्कृतिक कार्यक्रममा विविधि प्रतियोगिता र कलाकारहरुको प्रस्तुतिमा दर्शकहरु मन्त्रमुग्ध बनेका थिए । मनोरञ्जनात्मक कार्यक्रमका लागि राष्ट्रिय चर्चित कलाकारहरुको उपस्थितसंगै स्थानिय कलाकारको प्रस्तुतिमा दर्शकहरु रमाएका थिए ।
मंगलवार सांस्कृतिक कार्यक्रमतर्फ चर्चित लोक तथा दोहोरी गायिका प्रिती आलेको प्रस्तुतिमा दर्शकहरुले निकै रमाइलो गर्दै नाचेका थिए । त्यसैगरि गायक विधान कार्कि, गायिका रितु थापा, गायक रामप्रसाद पाण्डे र हास्य कलाकार टिकाराम साहित्यको प्रस्तुतिले पनि दर्शकलाई नचाएका थिए ।
बुधबार गायक तथा हास्य कलाकार राजा राजेन्द्र पोखरेल, गायिका सपना गाहा मगर, गायक दामोदर बस्याल, डान्सर बबिता बोहोरा र गायिका बिन्दु परियारको प्रस्तुती रहने छ । त्यस्तै बुधबार नै लोक भजन प्रतियोगिता, लोकदोहोरी प्रतियोगिवताको सेमिफाइनल, डान्स आइडल र अन्य विविध सांस्कृतिक कार्यक्रम हुने छ । बुटवल मण्डपस्थित निर्माणाधीन प्रदर्शनी केन्द्रमा ब्यापार मेला पुस १८ गतेसम्म चल्ने छ ।
प्रतिकृया दिनुहोस्
Gallery
Tags
Social Media
Related Posts
एकातिर खोला, अर्कैतिर पुल
- सत्यदीप सन्देश
- 19 May, 2024
सन्दीप लामिछानेले पाए सफाइ
- सत्यदीप सन्देश
- 15 May, 2024
